पाँचथर — छिमेकी मिक्लाजुङको सिको गर्दै पाँचथरको फाल्गुनन्द गाउँपालिकाले पचास मुरीभन्दा धेरै धान फलाउने किसानलाई नगद पुरस्कारसहित सम्मान गर्ने नीति ल्याएको छ ।गाउँपालिकाले एक सय मुरीभन्दा धेरै धान फलाउनेलाई नगद ५० हजार र ५० मुरीदेखि एक सय मुरीसम्म फलाउनेलाई ३० हजार रुपैयाँ नगदसहित पुरस्कृत गर्ने नीति ल्याएको हो ।गाउँपालिकाले पारित गरेको ‘धान उत्पादन कृषक प्रोत्साहन कार्यविधि–२०८०’ बमोजिम यसै आर्थिक वर्षदेखि किसानलाई पुरस्कार दिने निती ल्याएको हो । कार्यविधिअनुसार पुरस्कार पाउन किसानले गाउँपालिकामा निवेदन दिनुपर्नछ ।मापदण्डअनुसार योग्य किसानलाई पालिकाका कर्मचारी र जनप्रतिनिधिको अनुगमनपश्चात पुरस्कार दिइने प्रमुख प्रशासकीय अधिकृत निर्मल तुम्रोकले जानकारी दिए । गाउँपालिकाले मंसिर ७ गते सूचना जारी गर्दै किसानलाई पुरस्कारका लागि दाबी पेस गर्न भनेको हो ।