सिरहा, कार्तिक ४ गते । यु–१९ एसीसी प्रिमियर कपमा जापानमाथि १ सय ४४ रनले हराउँदै नेपाल यू–१९ एसिया कप पुगेको छ । दुई महिनापछि हुने एसिया कपमा नेपालले यूएईसँगै भारत र पाकिस्तानसँग खेल्नेछ ।
एसिया कपको छनोटका रुपमा रहेको यू–१९ एसीसी प्रिमियर कपको सेमिफाइनलमा शनिबार नेपाल र जापानसँग प्रतिस्पर्धा गरेको थियो । मलेसियाको बायोमास ओभलमा टस हारेर ब्याटिङको गरेको नेपालले २२.१ ओभरमा २ विकेट गुमाएर १४० रन बनाउँदा खेल वर्षाले रोकिन पुग्यो ।
खेल रोकिनुअघि आकाश त्रिपाठी ३५ र कप्तान देव खनाल ८ रनमा क्रिजमा थिए । त्यसअघि दिपक बोहोराले ७९ र अर्जुन कुमालले १० रन बनाएका थिए । भारी वर्षापछि नेपालले थप ब्याटिङ गर्न पाएनन् । र डकवर्थ लुइस (डीएल) मेथडका आधारमा जापानले २५ ओभरमा १८७ रनको लक्ष्य पायो ।
त्यसपछि नेपाली बलरको घातक बलिङ सामु जापान टिक्न सकेनन् । जापान ४३ रनमा अलआउट हुन पुग्यो । ११.४ ओभरमा सुवास भण्डारीले यामामोतोको विकेट लिएपछि जापानका रतविक शिवकुमार ब्याटिङमा आएका थिए । एक बल सामना गरेका उनले ब्याटिङलाई निरन्तरता दिन सकेनन् । नेपालका लागि हेमन्त धामी र दिपेश कँडेलले तीन÷तीन विकेट लिए भने सुवास भण्डारीले २ र आकाश चन्दले एक विकेट लिए ।
नेपाल र यूएई एसिया कपमा
आज भएको अर्को सेमिफाइनलमा यूएईले सिंगापुरलाई डिएल मेथडमा १० विकेटले हराएको छ । पहिले ब्याटिङ गरेको सिंगापुरले ४९ ओभरमा सबै विकेट गुमाएर १५६ रन बनाएको थियो । जवाफमा यूएईले ७ बलमा चार रन बनाउँदा पानीले खेल रोक्यो । पानी रोकिएपछि सुरु भएको खेलमा यूएईले ११३ रनको लक्ष्य पायो । जसलाई १५.५ ओभरमा विना विकेटको क्षतिमा भेट्टायो ।
फाइनलमा स्थान बनाएसँगै नेपाल र यूएईले यू–१९ एसिया कपमा स्थान बनाएको छ । दुवै टिम समूह ‘ए’मा पर्नेछन्, जसमा भारत र पाकिस्तान छन् ।
