लुम्बिनी प्रदेश सभाको दोस्रो कार्यकालमा ६१ वटा बैठक, यी हुन् प्रदेश सभा बैठकमा कम उपस्थित हुने सांसद

लुम्बिनी प्रदेश सभाको दोस्रो कार्यकालमा अहिलेसम्म ६१ वटा बैठक बसेकोमा कतिपय प्रदेश सभा सदस्य बैठकमा आक्कलझुक्कल उपस्थित हुने गरेका छन् ।प्रदेश सभाको पहिलो अधिवेशनमा १०, दोस्रो अधिवेशनमा २५, तेस्रो अधिवेशनमा ३, चौथो अधिवेशन अन्तर्गत साउन १२ गतेसम्म २३ पटक बैठक बसेको छ ।प्रदेश सभा सचिवालयका अनुसार प्रदेश सभा बैठकमा सबैभन्दा कम उपस्थित हुनेमा रुपन्देहीकी गीता गुरुङ छिन् । जनमत पाटीकी सांसद गुरुङ कुल ६१ बैठकमध्ये जम्मा २७ बैठक अर्थात् ४४ प्रतिशत बैठकमा मात्रै उपस्थित भएकी छन् ।दोस्रो नम्बरमा देवकरण प्रसाद कलवार छन् । कांग्रेसका कलावर जम्मा ३१ बैठकमा उपस्थित भएका छन् । प्रदेश सभा सदस्यद्वय अनुराग खड्का र आदेश कुमार अग्रवाल ३२ वटा बैठकमा उपस्थित छन् ।यस्तै, मधुसुदन शरण चौधरी कुर्मी ३३ वटा, वसिउद्धीन खाँ ३४ वटा, सरोज थापा ३६ वटा बैठकमा उपस्थित छन् भने धनबहादुर केसी र अब्दुल रजाक गद्दी ३७ वटा बैठकमा हाजिर भएको रेकर्ड छ । गिरीधारी लाल न्यौपाने ३८, सायर बानो ४० बैठकमा उपस्थित भएका छन् ।लुम्बिनी प्रदेश सभा सचिव दुर्लभ पुन मगरले बैठकमा कम उपस्थित भए पनि प्रदेश सभा सदस्यहरूले पाउने घर भाडादेखि औषधि उपचारसम्ममा सेवा सुविधा समान रूपमा लिने गरेको बताए ।प्रदेश सभा बैठकमा धेरै अनुपस्थित हुने सांसदहरू विभिन्न पारिवारिक समस्या र बिरामी भएर उपस्थित हुन नसकेको बताउँछन् । लुम्बिनी प्रदेश सभाको बैठकमा सबै धेरै अनुपस्थित भएकी सांसद गीता गुरुडले पारिवारिक कारणले गर्दा प्रदेश सभाको धेरै बैठकमा अनुपस्थित भएको बताइन् । ३१ बैठकमा मात्रै उपस्थित भएका सांसद देवकरण प्रसाद कलवारले स्वास्थ्यमा समस्या देखिएका कारणले बैठकमा उपस्थित हुन नसकेको बताए ।लुम्बिनी प्रदेश सभाका धेरैजसो बैठकमा उपस्थित हुने सांसदमा सभामुख तुलाराम घर्तीमगरसँगै खड्का बस्नेत र यमबहादुर नेपाली सार्की छन् । उनीहरू ६१ वटा बैठकमा उपस्थित छन् । बस्नेत यसअघि उद्योग तथा पर्यटनमन्त्री थिए भने सार्की  प्रदेश सभा विशेष अधिकार समितिका सभापति हुन् ।प्रदेश सभामा मेनुका खाँण, तुलसीप्रसाद चौधरी, सीता शर्मा, भगवती अधिकारी, शान्ति लोध ६१ मध्ये ६० वटा बैठकमा उपस्थित छन् । यस्तै मिना बुढा मगर ५९, दिनेश पन्थी र जमुना ढकाल ५८ वटा, धन बहादुर मास्के, राजु श्रेष्ठ, अर्जुन कुमार श्रेष्ठ र अम्बिका काफ्ले ५७ वटा बैठकमा उपस्थित छन् ।लुम्बिनी प्रदेश सभाको दोस्रो कार्यकालमा हालसम्म ४ जना मुख्यमन्त्री भएका छन् । लीला गिरी, डिल्लीबहादुर चौधरी, जोख बहादुर महरा मुख्यमन्त्री भइसकेका छन् भने अहिले चेतनारायण आचार्य सरकारको नेतृत्वमा छन् ।यीमध्ये सबैभन्दा धेरै जोख बहादुर महरा र सबैभन्दा कम लीला गिरी प्रदेश सभा बैठकमा उपस्थित भएका छन् । महरा ६१ वटा प्रदेश सभा बैठकमध्ये ५३ वटामा उपस्थित हुँदा हालका मुख्यमन्त्री चेत नारायण आचार्य ५०, डिल्ली बहादुर चौधरी ४५ र लीला गिरी ४१ वटा बैठकमा उपस्थित भएको तथ्याङ्क छ ।दाङका अधिकारकर्मी सुशील बस्नेतले प्रदेशसभा जनताको आवाज उठाउने स्थान भएकाले त्यहाँ बोल्ने र प्रदेश सभा बैठकमा जाने नजाने सांसदहरुलाई नागरिकले नजिकबाट नियाल्नुपर्ने बताए । उनले जनताबाट चुनिएका प्रतिनिधिहरू जनताको लागि बोल्छन् कि सेवा सुविधामात्रै लिन जान्छन्, त्यो हेनुपर्नेमा जोड दिए ।