जनकपुरधाम, २० पुस । गैरसरकारी संस्थाहरुको क्षमता अभिबृद्धिका लागि लिडरसिप एकेडमी नेपालले जनकपुरमा प्रदेश स्तरीय दुई दिने तालिम सुरु गरेको छ । प्रादेशिक दलित तथा आदिवासी जनजाती गैरसरकारी संस्थाहरुको क्षमता विकासलाई लक्षित गरेर संचालन गरिएको उक्त तालिममा मधेश प्रदेशका आठवटै जिल्लाबाट २५ जना भन्दा बढि सहभागी रहेको आयोजक संस्थाका कार्यक्रम बरिष्ठ कार्यक्रम प्रबन्धक प्रभावकर प्रधानले बताए ।
परियोजना प्रस्ताव लेखन, कार्यक्रम, योजना र कार्यान्वयन, बित्तिय व्यवस्थापन र बजेट तथा नेतृत्व विकास र वकालत लगायतका विषयबारे उक्त तालिम केन्द्रित रह्ने लिडरसिप एकेडमी नेपालकी कार्यक्रम संयोजक सविना बाडेले बताइन् । परियोजना प्रस्ताव लेख्न सहजता प्रदान गर्ने अभिप्रायले सात वटै प्रदेशका गैरसकारी संस्थाहरुको क्षमता विकासका लागि यस्तै तालिम संचालन गरिएको उनले थपिन् । उनका अनुसार यस अघि ६ चरणमा अन्य प्रदेशमा तालिम सम्पन्न गरि अन्तिम चरणमा मधेश प्रदेशमा तालिम संचालन गरिएको छ । गैरसरकारी संस्थाहरुलाई लक्षित गरेर संचालन भएको उक्त तालिममा प्रशिक्षकद्वय भाग्य नारायण महतो र सत्रुधन सिंहले सहजीकरण गर्ने उनले सुनाइ्न ।
